كلمنا عربى ياتهوينا

عاوج لسانك ليه يا اخينا؟؟

كلمنا عربى يا تهوينا

كل كلامك إستفزاز

فاكر العوجة ده إعجاز

حاول تتكلم وياه

هتلاقى نفسك تهت معاه

كل شويه يقول لكWhat

زهقنا وعلًى لنا الضغط

يجى يعترض يقول لك But

وانت يا عينى محروم من البط

تصبر وتكمل وياه

يمكن تفهم حاجة معاه

عوجة لسانه زادت وياه

احترت انا واتخنقت معاه

قلت له من فضلك يا أخينا

سيادتك عايش هنا وسيطنا

ايه لزمتها what ,وبط

قال لى ده لغة العصر الحالى

تسمعنى تقول تعليم عالى

قلت فى سرى يا اما تعالى

واتفرجى على اللى بيجرى لى

**************

لو عايزة اتابع أوهام ..هجرى بسرعة اجيب جورنان





فاتحة جريدة قلت أتفرج

وأتابع أخبارالناس

يمكن يوم اقدرأوصل

ليه الهم مالى الناس؟

شفت حكايه ماليه الصفحة

عن فرح واحد من الأعيان

وخبر إستشهاد إنسان

مرمى كده فى أخر الجورنان

ناس بتهرج وبتتفرج

ولا فيه حياء ولا احساس

ناس عايشه ومش فارقه معاها
 حال اخواتها ولاد الناس

تلاقى الاب ماشى فى حاله ... باله مالفكر ما بيهناش

بيفكر يجيب لعياله

ويبص لجيبه ما يلقاش

والام ماتفرقش كتير عنه

شايفة ضناها ما بتنساش

عايز يلبس هو كمان

زى صحابه ولاد الناس

قلت فى سرى ده صفحه خنيقه

ده جريده من عالم تانى

عالم فيه الكل أنانى

مصلحته فوق كل الناس

والخلق حواليه تنداس

قلت أطول بالى وأكمل
 يمكن من الجورنان اتعلم

مديت أيدى قلبت الصفحة

ولقيت التانية اللى عجيبة

ولا تفهم من اى مصيبة

ده حكايه عن راجل فاضى

بالعدل يناشد وينادى

وبايده التانيه بيهادى

كل اللى مش محتاج وخلاص

ولو محتاج يبعد عنك

ماهو فى الدفع مايعرفناش

لو منك فايده تعالى له

لو مش منك .....أوعى بلاش

ما هو متعين نائب عنك ياخد مالك.... وبإنصاف

ياخد حقك يديه لغيرك

هو اكيد ما بيظلمناش

اصلى الحق ده مش لينا

مش من العدل نساع بعضينا

ولا ما العدل نملاعينينا

بحاجات بتزول من الافلاس

بكرة يسافر ...لبلاد تانيه

ما هوعبا فلوسك وخلاص

اكبرهمه يسافر بره

يلحق يجرى بعد الهبرة

سافر زى ما غيره سافر ..بفلوسك وبقوتك سافر

وارفع كل قضايا الدنيا

واكسب لك حكمين من نفسك

وابقى قابلنى لو من نفسك خدت جنيه تصرفه على نفسك

كنت هاكمل اقرا كمان

بس لقيت انى انا انسان

صعب عليا اقرا واتابع

كلام مش منسوب للواقع

ولوعايزة اتابع اوهام

هاجرى بسرعه اجيب جورنان

هى سمية عملت ايه؟؟؟

هى سمية عملت ايه؟؟

علشان تنهان كده عليه

داخلة الجامعة لابسة خمارها

ساتر جسمها حامى وقارها

يمكن هى ده بقى غلطتها!!!!

لو كانت قطعت بلوزتها

أو شالت يجى نص جيبتها

كات زمانها فى محاضرتها

والكل وسع ليها جنبيه

شفتوا أدبها نفعها بايه ؟

لو كانت شعرها منكوش !

ولابسه لبس ما نشفهوش!

كات دخلت من غير كارنيه

لكن خمارها اخص عليه

حافظ جسمها ع الناس ليه ؟

مالهاش حق يا ناس إخيه

***********************

الواسطة

قالوا لنا خلصوا تعليم

علشان تبقوا بنى ادميين

قلنا لهم هو التعليم هيخلينا بنى آدميييييين

قالوا طبعا.. آمال مين ؟

بشهادتك تفتح لك بيت

ولا نويت تفلح فى الغيط

هزينا رأسنا قلنا وماله

ما هوأهلنا قبلنا ياما قالوا

بالتعليم نضمن لاولادنا مستقبل ولا يعلى عليه

وكبرنا وعلى ده اتربينا

جمعنا شهادات عبينا

وقمنا ندورعلى اشغال
بصيت على اعلان لوظيفة

ادى وظيفه وطالبه شهادة

اقل م اللى معايا بزيادة

وانا شهاداتى عال العال

وطلعت وانا راسم نفسى

حاطط القاب تسبق اسمى

بص لى موظف كان شغال

كمل بياناتك فى الحال

هو سعادتك ابن فلان

أو تقرب ل للواء علان

هزيت رأسى وكلى أسف

اصلى أبويا راجل غلبان

لقبه الوحيد انه انسان

وفى ثانيه لقيت ورقى فى يدى

شوف لك وظيفه تانيه ياسيدى

ازاى بس؟؟

انا جايب تقدير ممتاز

ومعايا درجه استاذ

هز لى راسه باستفزاز

الشغل ده ل ولاد الناس

وما يفرقش معانا تعليم

ولا شهادتك ده واخدها منين

أقول لك نصيحة يا أستاذ

فى جنبنا واحد خباز

عنده شغل لباقى الناس

السلام عليكم ورحمة الله وبركاته

كل سنه وانتم جميعا بكل خير

ويارب يارب السنه الجايه كنا نكون ضيوف عند الرحمن بعرفه

اللهم ارزقنا ولاتحرمنا واهلنا وسائر المسلمين

اللهم امييييييييييييييييييييييييييييين

والفيديو ده هديه منى لكم

يارب يعجبكم

لسه ميعاد تحقيقها ما جاش

أحلامنا كتيرة وبريئة فى خيالنا من مليون ليلة

كل ما نيجى نقرب منها نلاقى السكة لسه طويلة

نجرى وراها مانلحقهاش

نمشى شويه ما نسبقهاش

ما هى أحلامنا مش شايفانا

لسه ميعاد تحقيقها ماجاش

نُصبر ونَصبر نفسينا

ودموعنا بتنادى علينا

وندارى همومنا بنفسينا

ومسير الأحلام تنعاش

ما هى دايرة ودايرين كده فيها ...

أيام بتدور ورا بعضيها

فجأة تلاقى نفسك فيها

واقف خالى من الأحساس

خايف تحلم يمكن تصحى

خايف تسرح لاهتنداس

ماهى أحلامنا لسه بعيده

لسه ميعاد تحقيقها ما جاش

نحلم ونصبر نفسينا

وفى أمانيها مابننساش

نلاقى أحلامنا مش وسطينا

لسه ميعاد تحقيقها ماجاش

عايشين دنيا مش بتاعتنا

عشان ايامنا ما تنعاش

يمكن بكرة يطل علينا

وفى ايده أملنا ما ينساش

نرجع تانى نضحك .. نفرح

والاحزان ده ما نشوفهاش

نقفل بابنا على اوهامنا

بس واقعنا ما بيسيبناش

ليل ونهار بيفكر فينا

أحلامنا بقت ذكرى خلاص

نتعلق بسراب حوالينا

نفسنا احلامنا تنعاش

ونقابل بكرة لوحدينا

وواقعنا ألمه ما يهداش

بالاحلام او من غيرها

مين من الهم ما بيخلاش

نرسم ضحكة على شفايفنا

نضحك بيها على نفسينا

ونقول بكره أكيد أحلى

لأجل نهون على بعضينا

هى حياتنا وهنعيشها

فيها أحلام أو ما فيهاش

هونها يارب علينا

وأجعلها ما تهمناش

بس الاحلام هى طريقنا

لاجل نخليها تنعاش

وباحلامنا بنلونها

بلون هادى ما يوجعناش

نرسم الفرحه على قلوبنا

لاجل الاحزان ما نشوفها

ما هى احلامنا مش شايفانا

لسه ميعاد تحقيقها ماجاش

السلام عليكم ورحمة الله وبركاته

زوار مدونتى الكرام اعتذر بشده عن انقطاعى المتزايد عن حده عن المدونة وده طبعا بسبب رقى وتقدم الخدمة النتية

ماشاء الله الخدمة فى تحسن مستمر

وعملا بمبدا حسن الظن اتصلنا بالشركة علشان

نعرف سبب الانقطاع الدائم

وصدق او لاتصدق

طلع الانقطاع بسبب تحسين الخدمة

اه تصدقوا تحسين الخدمة دلوقت بقى بقطعها الدائم

ده التطور الطبيعى للتحسين

مش انتم بتشتكوا انها بتجى وتقطع

طيب احنا هنوحد الخدمه هنقطعها من غير ما تيجى بلا وجع دماغ

واضح ان الخدمة معصلجة معاهم شويه

اعتذربشده 

 ودعواتكم لنتى تعاطفكم وحده مش كفاية

أوعى تفكر تعييى فى يوم

داخل أكشف جوه عيادة

والجيب مخروم زى العادة

وبعد مادفعت وبزيادة

حسيت بالخنقة جوايا

وقعدت فى حالى مستنى

حبة اصفر حبة اغنى

فاتت ساعة وكمان ساعة

قمت أسال خير ياجماعة

هوأنا هستنى كام ساعة

رد تمرجى لازق جنبى

مليان جيبه كده ومعبى

عادى يا بيه ماهو دافع فيزيتا انما ايه

اصله حاجز مخصوص ليه

ومستعجل للى على أيديه

ضربت أيدى كف بكف

هو الكشف كمان له صنف

هز لى راسه بضحكة لئيمة

كل حاجه وليها القيمة

مااخترتش مستعجل ليه

بصيت لعيادته المليانة

وجيوبى من الفضا تعبانة

قلت له اهو تليفون جانا

معلش تعبتك ويانا

خد كشفك ورجع ما معانا

وخرجت جري وجيبى دفيان

بلا صحة بلا شغل جنان

وان صحى واحد يوم تعبان

يعد اللى معاه وينام

المشمهندس اسم الله عليه

 

ماشية فى حالى صابرة وشايلة

لقيت عمارة كده محنية

رفعت راسى اضرب بعينيا

ده عمارة من طوب مبنيه ؟؟

ولا شويه رمل ومية

ده مهندس هندس وبناها!

أبدعها وصمم فحواها!

بصيت تانى يمكن غلطة

يمكن عينى ده مش ظابطة

هى عمارة ولا فنارة

ولايكون بيت جوه الحارة

مديت ايدى اشيل نضارتى

ممكن يبقى العيب من عندى

بس الصورة زى ماهى

سألت واحد قاعد حارس

ده عمارة ولا ده بيت ناكس

قال لى ده الفن الأبداعى

وبلاش كلام بقى ملهوش داعى

ده البشمهندس أسم الله عليه

هندس ورسمها بايديه

كان جايب مجموع تعبان

لكن بماله بقى فنان

صمم يطلع يبقى مهندس

ده كان دايما اكبر حلمه

يكتبها دايما تسبق اسمه

ولما مكتب تنسيقه ظلمه

ولاهمه ولا حوق فيه

وجرى على بابى الباشا يشكيه

دادى قال له وتزعل ليه

بفلوسنا تبقى ما تبغيه

عايز تبقى ياتوتى ايه ؟

نفسى فى اسم يتبص عليه

ودفع له كام الف جنيه

وخد شهادة انما ايه

واهو بقى مهندس ابن الايه

وفجاة كده وإحنا بنتكلم

يمكن من علمه اتعلم

لقيت دوشة حاولينا وطوب

وناس بتجرى بهدومها يادوب

بصيت للحارس بغروب؟؟

رد عليا بصوت مخضوض

ده البشمهندس اسم الله عليه

عمارته وقعت اجرى يا بيه

***************