الثلاثاء، 14 ديسمبر، 2010

كلمنا عربى ياتهوينا



عاوج لسانك ليه يا اخينا؟؟

كلمنا عربى يا تهوينا

كل كلامك إستفزاز

فاكر العوجة ده إعجاز

حاول تتكلم وياه

هتلاقى نفسك تهت معاه

كل شويه يقول لكWhat

زهقنا وعلًى لنا الضغط

يجى يعترض يقول لك But

وانت يا عينى محروم من البط

تصبر وتكمل وياه

يمكن تفهم حاجة معاه

عوجة لسانه زادت وياه

احترت انا واتخنقت معاه

قلت له من فضلك يا أخينا

سيادتك عايش هنا وسيطنا

ايه لزمتها what ,وبط

قال لى ده لغة العصر الحالى

تسمعنى تقول تعليم عالى

قلت فى سرى يا اما تعالى

واتفرجى على اللى بيجرى لى

**************



هناك 19 تعليقًا:

  1. ههههههه حلوه أوي
    but why انتي زعلانه ما هي كل حاجه بقت all english all the time و اللغه العربيه دي بيئه
    حاجه تشل
    تحياتي ليكي

    ردحذف
  2. جميلة جدا ومشكلة دلوفني فعلا بتواجه الشباب
    اصل العربي تفريبا انقرض ولا ايه مشعارف موضوع في غاية الاهمية والعيب فينا احنا

    ردحذف
  3. شيرين سامى السلام عليكم ورحمة الله وبركاته
    تفتكرى انا ليا حق ازعل
    على رايك
    all english all the time
    وربنا يخلى لنا الاعلانات اللى مثقفانا
    هههههههه
    ردك تحفه ياشيرين
    اسعدنى مرورك وتعليقك دمتى بكل خير

    ردحذف
  4. غير معرف
    المشكله فعلا منتشرة جدا
    وكأن عوجة اللسان ده هى الدليل على التحضر والمدنيه فى نظرهم
    دمت بخير

    ردحذف
  5. سيبك إنتى .. أهم شئ فى الموضوع هو الــ (بط) ده

    ألا دى حاجه بتتاكل؟؟

    تألقتى يا وايزى المره دى

    أنا فخوره بيكى يا قمر

    ردحذف
  6. هههههههههههههههه
    انتي مشكلة و الله يا سيتي خلي الناس تهيص و علي رأي شرين سامي
    all English all the time

    well done well done
    هههههههههه

    ردحذف
  7. عبرتي عن الواقع باسلوب مدهش جدااااااا

    سلمت يمينك :)

    ردحذف
  8. مها البنا السلام عليكى ورحمة الله وبركاته
    طبعا مش محتاجة اول لك منورة
    اما بخصوص سؤالك السابق ذكره عن البط
    وبعد البحث والفحص
    وجدنا ان هذه الكلمه تدل على طائر قديم ونادر كان يقدم كصنف رئيسى فى الموائد المصريه القديمة
    وطبعا بعد ارتفاع الاسعار وانفلونزا الطيور
    بدأ هذا الطائر فى الانقراض مش من العالم لا اقصد من الموائد المصرية
    وان شاء الله قريبا هيكون جنب الديناصور فى قائمة الاساطير

    ردحذف
  9. منى ابو السعود
    السلام عليكم ورحمة الله وبركاته
    هما مهيصين على الااااااااااااااخر يامنى

    ردحذف
  10. الغاردينيا اهلا وسهلا بك معانا فى المدونة
    اسعدتنى جدا كلماتك
    دمتى بخير

    ردحذف
  11. عسولة ودمك شربات بوست خفيف ولذيذ
    وفعلا بقينا نحشر فى كل كلامنا بعض الكلمات الاجنبية
    وفى ناس مزودها حبتين قال اية استيل
    مشكورة حبيبتى تقبلى مرورى

    ردحذف
  12. هبة فاروق
    السلام عليكم ورحمة الله وبركاته
    الناس مش مزوداها حبتين بس يا هبة
    دول 3 او 4 حبات كده
    مرورك اسعدنى
    دمتى بكل خير

    ردحذف
  13. مفيش احسن من العربي
    وياسلام لما تكوني بتحبي عربي وتكلمي حد يكون كلامة كلة اجنبي
    بوست جميل

    ردحذف
  14. عيون الحب
    اكيد ما فيش احسن من العربى يكفى انها لغة القران
    ولو انتى تعرفى حد وكل كلامه اجنبى الحل بسيط جدا
    اقوله لك وامرى لله
    هما ساندوتشين فول وساندوتش طعمية وهو ياخد الجنسيه المصرى ويتكلم عربى زى الفل
    بس اوعى تزودى الجرعه
    اه 2 فول و1 طعمية
    انا مش مسئولة لو حصل تسمم
    دمتى بخير

    ردحذف
  15. ههههههه
    جميلة فعلا
    بس والله انا بقول كلام بالانجليزي بس مش بكون بقصد مجرد المنظرة يعني مثلا لو موبايلي رن وانا في الموصلات بحاول اقول مجرد جملتين بالانجليزي اني مش عارفةارد دلوقت وكلمني بعدين ده لو المتكلم بيلح وبيرن باستمرار
    وكلمة وات معايا ولازقة في لساني مش عارفة لية

    ردحذف
  16. رحاب صالح سلام عليكم ورحمة الله وبركاته
    مع ان كان نفسى اعرف كلمة what لازقه معاكى ليه
    يمكن لان كل حاجة فى حياتنا صعب اننا نستوعبها بسهولة
    فاكيد بتعيد السؤال من باب التاكيد وا لاستفسار
    نورتى المدونة
    ومرورك اسعدنى

    ردحذف
  17. عرفت كدا والله أعلم انك مدرسة رياااااااااااضة ليه كدا يا بنتى دا كنت ناوية اجيلك هنا على طول ينفع كدا يعنى ههههههههههههههههه

    تشرفت بزيارتك و اتشرفت اكتر لما دخلت مدونتك بجد

    بخصوص الانجليزى بقى عندك حق جدا جدا جدا بس فعلا اهو كله بقى انجليزى اشمعنى الناس يعنى مش هتتكلم انجليزى اهو حاجه من نفسهم

    ردحذف
  18. جارة القمر
    السلام عليكم ورحمة الله وبركاته
    اهلا اهلا زميله الكفاح ورحلة الشقاء
    انا كمان تشرفت بزيارة سيادتك جدا
    نورتى المدونة

    ردحذف
  19. eToro صفقات التداول المفتوحة في 227,585,248

    eToro هي السوق الرائدة للجيل التالي من المتداولين والمستثمرين. بإمكانك تحقيق أرباح مباشرة من خلال التداول عبر الإنترنت وقيادة خمسة ملايين متداول اجتماعي حول العالم، والحصول على الأموال باعتبارك تمثل جيلاً جديداً من مدراء الصناديق عندما ينسخ الآخرون استثماراتك.

    ردحذف