الجمعة، 3 ديسمبر، 2010

لو عايزة اتابع أوهام ..هجرى بسرعة اجيب جورنان



فاتحة جريدة قلت أتفرج

وأتابع أخبارالناس

يمكن يوم اقدرأوصل

ليه الهم مالى الناس؟

شفت حكايه ماليه الصفحة

عن فرح واحد من الأعيان

وخبر إستشهاد إنسان

مرمى كده فى أخر الجورنان

ناس بتهرج وبتتفرج

ولا فيه حياء ولا احساس

ناس عايشه ومش فارقه معاها
 حال اخواتها ولاد الناس

تلاقى الاب ماشى فى حاله ... باله مالفكر ما بيهناش

بيفكر يجيب لعياله

ويبص لجيبه ما يلقاش

والام ماتفرقش كتير عنه

شايفة ضناها ما بتنساش

عايز يلبس هو كمان

زى صحابه ولاد الناس

قلت فى سرى ده صفحه خنيقه

ده جريده من عالم تانى

عالم فيه الكل أنانى

مصلحته فوق كل الناس

والخلق حواليه تنداس

قلت أطول بالى وأكمل
 يمكن من الجورنان اتعلم
مديت أيدى قلبت الصفحة

ولقيت التانية اللى عجيبة

ولا تفهم من اى مصيبة

ده حكايه عن راجل فاضى

بالعدل يناشد وينادى

وبايده التانيه بيهادى

كل اللى مش محتاج وخلاص

ولو محتاج يبعد عنك

ماهو فى الدفع مايعرفناش

لو منك فايده تعالى له

لو مش منك .....أوعى بلاش

ما هو متعين نائب عنك ياخد مالك.... وبإنصاف

ياخد حقك يديه لغيرك

هو اكيد ما بيظلمناش

اصلى الحق ده مش لينا

مش من العدل نساع بعضينا

ولا ما العدل نملاعينينا

بحاجات بتزول من الافلاس

بكرة يسافر ...لبلاد تانيه

ما هوعبا فلوسك وخلاص

اكبرهمه يسافر بره

يلحق يجرى بعد الهبرة

سافر زى ما غيره سافر ..بفلوسك وبقوتك سافر

وارفع كل قضايا الدنيا

واكسب لك حكمين من نفسك

وابقى قابلنى لو من نفسك خدت جنيه تصرفه على نفسك

كنت هاكمل اقرا كمان

بس لقيت انى انا انسان

صعب عليا اقرا واتابع

كلام مش منسوب للواقع

ولوعايزة اتابع اوهام

هاجرى بسرعه اجيب جورنان






هناك 25 تعليقًا:

  1. كلماتك كلها من واقع الحياه
    اسلوب جميل فى الكتابه
    ربنا يسعد اوقاتك

    ردحذف
  2. أزال المؤلف هذا التعليق.

    ردحذف
  3. السلام عليكم ورحمة الله وبركاته mrmr
    اسعدنى مرورك
    وربنا يسعد اوقاتنا جميعا
    دمتى بخير

    ردحذف
  4. الله عليكي و علي الواقعية
    بجد السهل الممتنع
    انا راي ان احسن حاجة في الزمن ده نقرا مجلة ميكي :)

    علي فكرة امنيتك اتحققت و كتبت اول محاولاتي بالعامية ضمن سلسلة ليالي مصريه
    http://laialy-masrya.blogspot.com/
    هاستني رايك

    ردحذف
  5. اهلا اهلا منى ابو السعود هنا
    وانا اقول المدونة منورة ليه
    واخيرا اسفر الحاحى عن شىء
    اروح بقى بسرعه اقرا قبل ما نتى المحترم يفصل
    واقول لك راى بالتفصيل الممل هناك
    اسعدنى مرورك

    ردحذف
  6. جامدة جداااا عجبتنى اوى انتى شاعرة مميزة فكرتينى
    بشعر احمد فؤاد نجم
    كلماتك سلسة ومعبرة ورائعة تقبلى مرورى ومتبعاكى
    وفى انتظار متابعتك

    ردحذف
  7. هبة فاروق السلام عليكم ورحمة الله وبركاته
    ربنا يكرمك على كلامك الكبير ده
    واسعدنى انها عجبتك
    وزدت شرفا بمتابعتك
    اتمنى لك كل توفيق

    ردحذف
  8. حلوه موهبتك أما الكلمات فهي هم تقيل و كابوس للأسف مش عارفه هنصحى منه امتى

    ردحذف
  9. شيرين سامى
    السلام عليكم ورحمة الله وبركاته
    تقدرى تقولى انها فضفضه على ورق
    وشكرا على كلامك الرقيق
    وفعلا الجرايد من كتر زيفها مابقاش حد عارف ايه الصح فيها وايه المكذوب
    تحياتى

    ردحذف
  10. اولا دعييني احييكي على اسلوب حضرتك
    ما شاء الله اسلوب جميل جدا وتناول جيد للفكرة وعرض رائع

    ==========

    نعود للموضوع ونقول بالتأكيد الجرايد ماعدتش زي زمان وانا بصراحة ببعد عن قراية الجرايد عن قصد عشان ياما هشوف بلاوي هتعلي لي الضغط ياما هشوف فانتازيا مش بتحصل ولا هتحصل

    لكن فعلا بحس براحة نفسية لما مابقراش الجرايد
    كده كده مش هيكون فيها غير مسلسل الفنان الفلاني واعلان المدينة الفلانية ام 200 الف بس للشقة وماتش علان مع ترتان وحظك النهاردة اللى اكيد نحس ومشاكل تخلي الواحد يبكي بالدموع وكلام والسلام عن الشعب النايم التعبان

    نتمنى أن حال البلد يتغير عما قريب

    ===========

    كلمات جميلة ومدونة رائعة
    هذه اول زيارة لي وان شاء الله لن تكون الاخيرة

    بالتوفيق دائما
    وفي انتظار ابداعات أخرى

    خالص تقديري

    تقبلي مروري
    Casper

    ردحذف
  11. السلام عليكم
    رائع ما تكتبين
    قلما يعبر عن واقع مرير باسلوب مميز
    نعم الوصف ونعم التعبير
    دومتي بخير

    ردحذف
  12. الاستاذ: casper
    اسمح لى ارحب بك على صفحات مدونتى المتواضعة
    وجزاك الله خيرا على اطراءك
    وفعلا زى ما حضرتك قلت ان الجرايد بقى كلامها مالوش اى صله بالحياه والواقع
    هى مجرد رغى وياريته بفايدة
    دمت بكل خير

    ردحذف
  13. استاذ :مجدى حاتم
    وعليكم السلام ورحمة الله وبركاته
    جزاك الله خيرا عن اطراءك وتشجيعك الدائم
    وفى انتظار بوستاتك التى طاااااال انتظارها
    دمت بكل خير

    ردحذف
  14. الله الله
    اسلوب رائع ومتميز

    ردحذف
  15. استاذ : عمرو يسرى السلام عليكم ورحمة الله وبركاته
    جزاك الله خيرا على رايك المشجع
    دمت بخير

    ردحذف
  16. قهوة بالفانيليا السلام عليكم ورحمة الله وبركاته
    اسعدنى مرورك جدا
    دمتى بكل خير

    ردحذف
  17. الله اسلوبك جميل فى الكتابة وسهل
    وبيحكى عن شئ واقعي فى البلد
    ربنا يكفينا شر المستخبي

    ردحذف
  18. أنا جيت يا وايزى .. إتأخرت عليكى؟؟

    متألقه كالعاده

    ومناقشه موضوع حيوى برضه كالعاده


    لا تعليق يا قمر ........... كالعاده :)

    ردحذف
  19. florida
    اهلا بك معانا فى المدونة
    وسعيدة برايك فيها
    دمتى بخير

    ردحذف
  20. مها البنا السلام عليكم ورحمة الله وبركاته
    اهلا اهلا
    منورة المدونة كلها
    تالق ايه بس يامها
    انصحك تبقى تشوفى مدونةاسمها الطير المهاجر
    انصحك تشوفيها
    هتعرفى يعنى ايه زجل وتالق وابداع
    وتعرفى اننا لسه بنحاول
    دمتى بكل خير

    ردحذف
  21. شفتها حضرتك

    ومغيرتش كتير

    شايفاكى تألقتى برضه :)

    تسلمى يا رافعه معنوياتى

    ردحذف
  22. هههههه صح الافضل مشتريش جرائد

    خلينا في مدوناتنا احسن ^_^

    تحية صباحيه

    ردحذف
  23. مهاالبنا متاكده انك شوفتيها كويس
    مااعتقدتش
    وانا اللى من حقى اقول تسلمى لى يارافعه معنوياتى

    ردحذف
  24. الغاردينيا
    علىرايك بلا جرايد بلا وجع دماغ
    خلينا فى المدونات احسن
    دمتى بخير

    ردحذف