السبت، 31 ديسمبر 2011

إعتذار واجب








السلام عليكم ورحمة الله وبركاته

معلش ياجماعه ده لا هيكون اول ولا اخر اعتذار عن تاخرى الدائم والمستمر عليكم

(ربنا ما يقطعش ليا عادة ولا يحرمكم من انقطاع نتى الدائم )

وبما انى ما لقتش اى فايدة ترجى من النت فقررت انتحر بطريقه اخر ى
.
.
.
.
.
النهاردة ان شاء الرحمن هيكون اخر  يوم لنا كلنا فى سنه 2011

.
.
.
.

واخر يوم ليا انا كمان
.
.
.
.

مش فى الحياة
.
.
.
.
لا 
.
.
.
.
اخر يوم ليا فى العزوبيه
.
.
.
فاسالكم الدعاء لي ولزوجى بان يرزقنا الله الحياه الصالحة التى ترضيه عنا وان يجدنا حيث امرنا والا يجدنا حيث نهانا
وان يرزقنا الذريه الصالحة الحافظه للقرآن
.
.
.
دعواتكم ياجماعة مش تأمنوا فى سركم
.
.
تعاطفكم لوحده مش كفايه
.
.
اختكم
 wise

الأحد، 1 مايو 2011

**كام مليون نسمة ضحية


كام مليون نسمة ضحية
بقى هى ده ياعرب الحرية
دم ولادك غطى شوارعك
قالوا فداكى و لا لحظة جرحك
ده احنا عشانك نديكى روحنا
بس تكونى وطن للكل
خيرك لينا مش للجاير
سوريا لبيا مصر جزاير
ليه ؟
كل عربى فيكى حاير؟
خايف من بكرة واليوم
حاسس انه مالهوش لزوم
عايش بس يشقى ويتعب
أو متغرب اخر الكون
ماهى بلده بقت مش طايقاه
حضنت غيره ومش عايزاه
 ليه ياعروبة حالنا اتدهور ؟؟؟؟
اسلامنا حث على الشورى
ماهو دينا ديمقراطى مشورة
جم حكامنا عكسوا الصورة
خلوا الحكم  رئاسى  ذميم
من حقه كل التعتيم
طمس الحق وخنق الصوت
ده سياسته لحد اما يموت
امتى هنسمع صدى للصوت
؟؟؟؟؟؟؟؟؟؟؟؟؟؟؟؟؟؟




السبت، 25 ديسمبر 2010

.........................قالوا لجنة وانتخابات




قالوا لنا لجنة وانتخابات

قلنا بس الكدب اهو مات

يحيا العدل وبقى لينا صوت

نختار حاجة لنطق نموت

واحترنا جدا نختار مين

خلينا نشوف ..المرشحين

واد ياحسين واد يا امين

تعالوا نشوف هنرشح مين ؟؟

شاور حسين بايديه الاتنين
************
لقيت مرشح ملو العين

بيقول لى مصلحتك عندى

هات صوتك قبل ما تعدى

قلت لنفسى صوتى امانة

وشبعنا م الكل ملامة

انا لازم أتأنى شويه

مش كل مرة هتسلم هيا
************
رحت أشوف النايب التانى

شكله مريح الكل ارتاح له

أساله اعرف خطة اهله

قال لى صوتك عندى غالى

ومد لى ايده...باستسلام

قلت فى سرى ياواد ياسلااااااام

ده الراجل ده غاوى سلام

اتاريه حط لى حاجة فى ايدى

وقال لى الباقى بكرة يا سيدى

بصيت له و بكل قرف

صوتى امانة ياعمنا حس

وعايزنى ابيعه.! ازاى بس ؟؟

قال لى اتفضل طب من عندى

قلت اكمل ولا استسلم

فرصه وجاتنى لغايه عندى

اختار حاجة بقى من نفسى
**************
ادى التالت واقف جامد ..

قرب منى قال لى بطاقتك

قلت له ليه ؟؟

قال لي وسيادتك هنا ليه؟

قلت له جاى اشوف واتعرف

مين يستاهل يبقى مرشح

قال لى هوانت جاى تهرج

صوتك ايه يا أبو صوت مبحوح

فوت من وشى يا سنكوح

صوتك عندى اتفضل روح

وبعد اسبوعين كامليين

قلت اشوف اللى نجح مين
*************
نجح التالت ازاى بس

ولا حد اتبرع له بحس

مشيت لوحدى مستغرب

لا اخترناه ولا رشحناه

نجح ازاى منه لله








الثلاثاء، 14 ديسمبر 2010

كلمنا عربى ياتهوينا



عاوج لسانك ليه يا اخينا؟؟

كلمنا عربى يا تهوينا

كل كلامك إستفزاز

فاكر العوجة ده إعجاز

حاول تتكلم وياه

هتلاقى نفسك تهت معاه

كل شويه يقول لكWhat

زهقنا وعلًى لنا الضغط

يجى يعترض يقول لك But

وانت يا عينى محروم من البط

تصبر وتكمل وياه

يمكن تفهم حاجة معاه

عوجة لسانه زادت وياه

احترت انا واتخنقت معاه

قلت له من فضلك يا أخينا

سيادتك عايش هنا وسيطنا

ايه لزمتها what ,وبط

قال لى ده لغة العصر الحالى

تسمعنى تقول تعليم عالى

قلت فى سرى يا اما تعالى

واتفرجى على اللى بيجرى لى

**************



الجمعة، 3 ديسمبر 2010

لو عايزة اتابع أوهام ..هجرى بسرعة اجيب جورنان



فاتحة جريدة قلت أتفرج

وأتابع أخبارالناس

يمكن يوم اقدرأوصل

ليه الهم مالى الناس؟

شفت حكايه ماليه الصفحة

عن فرح واحد من الأعيان

وخبر إستشهاد إنسان

مرمى كده فى أخر الجورنان

ناس بتهرج وبتتفرج

ولا فيه حياء ولا احساس

ناس عايشه ومش فارقه معاها
 حال اخواتها ولاد الناس

تلاقى الاب ماشى فى حاله ... باله مالفكر ما بيهناش

بيفكر يجيب لعياله

ويبص لجيبه ما يلقاش

والام ماتفرقش كتير عنه

شايفة ضناها ما بتنساش

عايز يلبس هو كمان

زى صحابه ولاد الناس

قلت فى سرى ده صفحه خنيقه

ده جريده من عالم تانى

عالم فيه الكل أنانى

مصلحته فوق كل الناس

والخلق حواليه تنداس

قلت أطول بالى وأكمل
 يمكن من الجورنان اتعلم
مديت أيدى قلبت الصفحة

ولقيت التانية اللى عجيبة

ولا تفهم من اى مصيبة

ده حكايه عن راجل فاضى

بالعدل يناشد وينادى

وبايده التانيه بيهادى

كل اللى مش محتاج وخلاص

ولو محتاج يبعد عنك

ماهو فى الدفع مايعرفناش

لو منك فايده تعالى له

لو مش منك .....أوعى بلاش

ما هو متعين نائب عنك ياخد مالك.... وبإنصاف

ياخد حقك يديه لغيرك

هو اكيد ما بيظلمناش

اصلى الحق ده مش لينا

مش من العدل نساع بعضينا

ولا ما العدل نملاعينينا

بحاجات بتزول من الافلاس

بكرة يسافر ...لبلاد تانيه

ما هوعبا فلوسك وخلاص

اكبرهمه يسافر بره

يلحق يجرى بعد الهبرة

سافر زى ما غيره سافر ..بفلوسك وبقوتك سافر

وارفع كل قضايا الدنيا

واكسب لك حكمين من نفسك

وابقى قابلنى لو من نفسك خدت جنيه تصرفه على نفسك

كنت هاكمل اقرا كمان

بس لقيت انى انا انسان

صعب عليا اقرا واتابع

كلام مش منسوب للواقع

ولوعايزة اتابع اوهام

هاجرى بسرعه اجيب جورنان






الأحد، 28 نوفمبر 2010

هى سمية عملت ايه؟؟؟






هى سمية عملت ايه؟؟

علشان تنهان كده عليه

داخلة الجامعة لابسة خمارها

ساتر جسمها حامى وقارها

يمكن هى ده بقى غلطتها!!!!

لو كانت قطعت بلوزتها

أو شالت يجى نص جيبتها

كات زمانها فى محاضرتها

والكل وسع ليها جنبيه

شفتوا أدبها نفعها بايه ؟

لو كانت شعرها منكوش !

ولابسه لبس ما نشفهوش!

كات دخلت من غير كارنيه

لكن خمارها اخص عليه

حافظ جسمها ع الناس ليه ؟

مالهاش حق يا ناس إخيه

***********************






الخميس، 18 نوفمبر 2010

الواسطة


قالوا لنا خلصوا تعليم

علشان تبقوا بنى ادميين

قلنا لهم هو التعليم هيخلينا بنى آدميييييين

قالوا طبعا.. آمال مين ؟

بشهادتك تفتح لك بيت

ولا نويت تفلح فى الغيط

هزينا رأسنا قلنا وماله

ما هوأهلنا قبلنا ياما قالوا

بالتعليم نضمن لاولادنا مستقبل ولا يعلى عليه

وكبرنا وعلى ده اتربينا

جمعنا شهادات عبينا

وقمنا ندورعلى اشغال
بصيت على اعلان لوظيفة

ادى وظيفه وطالبه شهادة

اقل م اللى معايا بزيادة

وانا شهاداتى عال العال

وطلعت وانا راسم نفسى

حاطط القاب تسبق اسمى

بص لى موظف كان شغال

كمل بياناتك فى الحال

هو سعادتك ابن فلان

أو تقرب ل للواء علان

هزيت رأسى وكلى أسف

اصلى أبويا راجل غلبان

لقبه الوحيد انه انسان

وفى ثانيه لقيت ورقى فى يدى

شوف لك وظيفه تانيه ياسيدى

ازاى بس؟؟

انا جايب تقدير ممتاز

ومعايا درجه استاذ

هز لى راسه باستفزاز

الشغل ده ل ولاد الناس

وما يفرقش معانا تعليم

ولا شهادتك ده واخدها منين

أقول لك نصيحة يا أستاذ

فى جنبنا واحد خباز

عنده شغل لباقى الناس