الثلاثاء، 27 يوليو 2010

المشمهندس اسم الله عليه




 
ماشية فى حالى صابرة وشايلة



لقيت عمارة كده محنية



رفعت راسى اضرب بعينيا



ده عمارة من طوب مبنيه ؟؟



ولا شويه رمل ومية



ده مهندس هندس وبناها!



أبدعها وصمم فحواها!



بصيت تانى يمكن غلطة



يمكن عينى ده مش ظابطة



هى عمارة ولا فنارة



ولايكون بيت جوه الحارة



مديت ايدى اشيل نضارتى



ممكن يبقى العيب من عندى



بس الصورة زى ماهى



سألت واحد قاعد حارس



ده عمارة ولا ده بيت ناكس



قال لى ده الفن الأبداعى



وبلاش كلام بقى ملهوش داعى



ده البشمهندس أسم الله عليه



هندس ورسمها بايديه



كان جايب مجموع تعبان



لكن بماله بقى فنان



صمم يطلع يبقى مهندس



ده كان دايما اكبر حلمه



يكتبها دايما تسبق اسمه



ولما مكتب تنسيقه ظلمه



ولاهمه ولا حوق فيه



وجرى على بابى الباشا يشكيه



دادى قال له وتزعل ليه



بفلوسنا تبقى ما تبغيه



عايز تبقى ياتوتى ايه ؟



نفسى فى اسم يتبص عليه



ودفع له كام الف جنيه



وخد شهادة انما ايه



واهو بقى مهندس ابن الايه



وفجاة كده وإحنا بنتكلم



يمكن من علمه اتعلم



لقيت دوشة حاولينا وطوب



وناس بتجرى بهدومها يادوب



بصيت للحارس بغروب؟؟



رد عليا بصوت مخضوض



ده البشمهندس اسم الله عليه



عمارته وقعت اجرى يا بيه



***************



هناك 10 تعليقات:

  1. بسم الله ما شاء الله

    حلوه دى


    مناسبه مع امتحانات الثانويه العامه ونتايجها

    مشكلتنا ان احنا بندى قيمه للثانويه العامه اكتر كتير من حقها

    وبندى قيمه لمسمى الكليه اكتر كتير من حقه


    يعنى كل علمى علوم عاوزين طب وصيدله وكل علمى رياضه عاوزين هندسه

    اما بتوع الادبى فكلهم عاوزين اقتصاد وعلوم سياسسيه

    ونسينا ان اللى عاوز ينجح هينجح فى اى مكان


    مال ده بقى ومال الزجل؟؟

    هو ده لب الموضوع

    عجبتنى الفكره والأسلوب

    استمرى يا وايز

    متابعاكى بشغف

    تحياتى

    ردحذف
  2. لا بجد والله جامدة اوى
    على قد ماهى كوميدية جدا لكن فعلا بتجسد واقع ومهزلة التعليم الخاص
    اى واحد جايب 50 فى المية ممكن يدخل كلية المفروض انها بتاخد من 80 فى المية مثلا

    عاوزين بقى القصص الحلوة بتاعتك
    انا مبسوطة اوى بمدونتك والله

    ردحذف
  3. مها البنا سلام عليكم ورحمة الله وبركاته
    اكيد مش محتاجة انى اقول لك انك منورة المدونة
    وبما ان حضرتك لخصتى ومادخلتيش مدونتى فاضيه وجبتى معاكى لب الموضوع فقلت نريح هنا حبه ونقزقز مع يعض
    انا قلتى حاجة جميله كل علمى عايزين طب او هندسه
    وكل ادبى عايزين سياسه واقتصاد
    نسيوا تماما ان اللى عايز ينجح هينجح فى اى مجال
    المهم يكون بيعمل الحاجة اللى بيحبها
    ويكون مؤهل لادائها صح

    سعيده جدا انها عجبتك

    ردحذف
  4. noha salh
    سلام عليكم
    بجد اسعدنى جدا ردك عليا ووحشتنيى فعلا
    وطبعا التعليم الخاص مش مقصر مع حد ولا حارم اى حد من حاجة
    معاك فلوس تبقى اللى انت عايزه
    المشكله انهم واخدين التعليم تكمله للواجهة الاجتماعيه
    ابنى مهندس ابنى دكتور
    وكانهم لوقالوا ابنى مدرس او محاسب او محامى وحشه مثلا
    وبالنسبه للقصص اللى اتمنى انها تكون حلوة
    وتعجبك هتلاقيها فى اخر المدونة
    (انها حقا اسرة محترمة جدا جدا )

    ردحذف
  5. احلام الفتى الطاير هههههههههههه
    بجد سردك للموضوع جميل
    وبيجسد اللى احنا فيه
    كل حاجه بالفلوس
    فكرتينى باغنيه كانت بتغنيها تحيه كاريوكا بتقول
    ( بفلوسك وبمالك ح تنول اللى فى بالك )
    الالقاب يا عزيزتى دلوقتى بتشترى بالفلوس
    ذى الباشويه والباكويه زماااااااااااااااان
    فيها ايه لما الواحد يشترى الشهاده والتعليم ذى مرجان احمد مرجان ههههههههههههههههههه
    مدونتك جميله
    بالتوفيق
    ربنا يسعدك

    ردحذف
  6. mrmr
    سلام عليكم ورحمة الله وبركاته
    والله وفكرتينا
    الاغنية ده اللى كنا بنسمعها زمان فى الفيلم ولا فاهمينها
    الناس بتوع زمان دوول كانوا حكمة الست لخصت كل حاجة فى الاغنيه وقالت لنا المفيد:كله بالفلوس
    بس هو تفتكرى الباشويه اتلغت ما اظنش
    وانا معاكى جدا فى موضوع شراء الشهادات
    الله لو اتنفذ
    تخيلى كده الواحد يدخل على مكتب التنسيق يعمل له اوردر كليه علوم
    او كليه طب
    ويدفع الحساب والكليه توصله ديلفرى بعد سنتين ولا حاجة
    ياسلاااااااااااااااام اهى كلها احلام

    ردحذف
  7. حب ماتعمل حتى تعمل ماتحب
    للاسف الشديد ان الانسان يسعى دائما للالقاب ناظرا لفلان وفلان وينسى مايحب من عمل فقد نجده جيدا فى القسم الادبى ولكن لانه ينظر الى ابن فلان وفلان ويريد منه والده ان يكون مهندسا او طبيبا فيدخل القسم العلمى رغبة لابيه
    ويكون هذا ناتج لاشياء كثيرة لايحمد عقباها

    ردحذف
  8. الله جميله جدا واسلوب فى خفه دم وسرد جميل للمهزله اللى وصل اليها التعليم

    ردحذف
  9. magdy Hatem
    سلام عليكم ورحمة الله وبركاته
    فعلا بقى الموضوع مجرد بحث عن الالقاب
    وتباهى بواجهة اجتماعية
    وفى الاخر يحدث ما لايحمد عقباه
    جزاك الله خيرا على رايك
    دمت بخير

    ردحذف
  10. عمرو يسرى
    سلام عليكم ورحمة الله وبركاته
    سعدت برايك فى مدونتى
    وفعلا التعليم بقى مهزلة فعلا

    ردحذف